कजाकिस्तानमा बुधबार ६७ यात्रुसहित उडेको एक विमान दुर्घटनाग्रस्त भएको छ। कजाकिस्तानको विपत् व्यवस्थापन मन्त्रालयले दुर्घटनाको पुष्टि गर्दै २५ जनालाई जीवित उद्धार गरिएको र तीमध्ये २२ जनालाई अस्पताल लगिएको जानकारी दिएको छ।
दुर्घटनामा परेको विमान एम्ब्रेयर १९० मा ६२ यात्रु र चालक दलका पाँच सदस्य गरी ६७ जना सवार थिए। उक्त विमान अजरबैजान एयरलाइन्सद्वारा सञ्चालित थियो।
विमान अजरबैजानको राजधानी बाकुबाट रुसको ग्रोज्नीका लागि उडेको थियो। आँधीबेहरीका कारण यसलाई रुट परिवर्तन गरी कजाकिस्तानको अक्ताउ नजिकै ‘डाइभर्ट’ गरिएको थियो। उक्त क्षेत्रमा विमान खसेपछि आगो लागेको स्थानीय अधिकारीहरूले बताएका छन्।
दुर्घटनाको कारण अझै खुल्न सकेको छैन। थप अनुसन्धान जारी रहेको जनाइएको छ।
