नेकपा एमालेका सचिव लेखराज भट्टको भाइरल भिडियोबारे प्रष्टिकरण

Image
Nisarga Hospital

नेकपा एमालेका सचिव लेखराज भट्टको एउटा पुरानो भिडिओ यतिबेला सामाजिक सञ्जालमा भाइरल भएको छ। उक्त भिडिओमा भट्टले पार्टी अध्यक्ष केपी शर्मा ओलीप्रति केही असन्तुष्टि जनाएझैं सुनिन्छ। खासगरी, ओलीले माओवादीलाई आतंककारी भनेको प्रसंगमा भट्टको असन्तोष देखिन्छ। पछिल्लो समयमा भट्टले एमाले छाड्न लागेको चर्चा चलिरहेका बेला दुई वर्ष पुरानो यो भिडियो सार्वजनिक भएको हो। तर, भट्टले पार्टी नेतृत्वप्रति कुनै गुनासो नभएको र एमाले छाड्न लागेको चर्चा केवल अफवाह भएको बताएका छन्।

CP Hospital Dhangadhi

भिडिओको यथार्थबारे भट्टको भनाइ

भट्टका अनुसार, उक्त भिडियो दुई वर्षअघि पार्टीको प्रदेश अधिवेशनको समयको हो। उनी स्वास्थ्य समस्याका कारण घरमै आराम गरिरहेको बेला केही साथीहरूसँगको संवादमा यस्तो कुरा उठेको थियो। भट्टले स्पष्ट पारेका छन् कि यो अहिलेको घटना होइन र त्यस समयको सन्दर्भमा पार्टी नेतृत्वसँग केही विषयमा संवाद गर्नुपर्ने कुरामात्रै राखिएको थियो। उनले भने, “त्यो भिडियोको सन्दर्भ पुरानो हो र त्यहाँ मैले कुनै नेगेटिभ कुरा गरेको छैन।”

भाइरल भिडियोमा उठेको विषय

भिडियोमा ओलीले माओवादीलाई आतंककारी भनेर बोलेको विषयप्रति असहमति जनाइएको छ। यसबारे भट्टले भनेका छन्, “कहिलेकाहीं अध्यक्षले भुलेर तत्काल केही बोल्नुभयो भने पछि सच्याउनुभयो। त्यो विषय मैले साथीहरूलाई कन्भिन्स गर्दा उठेको हो। यसलाई अन्यथा लिनुहुन्न।”

एमाले छाड्ने चर्चा अफवाहमात्रै

पछिल्लो समयमा भट्टले एमाले छाड्न लागेको चर्चा माओवादी नेताहरूले फैलाएको दाबी गर्दै उनले यस्तो हल्लामा सत्यता नभएको बताए। उनका अनुसार, माओवादीका केही नेताहरूले भ्रम सिर्जना गर्न खोजिरहेका छन्। भट्टले भने, “जब मान्छेले विचारले परास्त गर्न सक्दैन, तब भ्रम सिर्जना गर्ने प्रयास गर्छ। ममाथि प्रहार यसैको उदाहरण हो।”

पार्टी नेतृत्वप्रति विश्वास कायम

भट्टले पार्टी नेतृत्वप्रति कुनै असन्तुष्टि नरहेको र आफू एमालेमै रहेर काम गर्न प्रतिबद्ध रहेको बताएका छन्। उनले भने, “यदि कुनै असन्तुष्टि भएको भए म पार्टीमै किन बस्थेँ? हामी एमालेबाटै पार्टीका लक्ष्य पूरा गर्न सक्छौं भन्ने विश्वास छ। बाहिर असन्तुष्टि पोख्दै हिँड्ने मेरो संस्कार र स्कुलिङ होइन।”

भट्टको यो प्रतिक्रिया भाइरल भिडियो र एमाले छाड्ने अफवाहप्रति प्रष्टिकरणका रूपमा आएको छ। उनका अनुसार, यो सबै भ्रम सिर्जना गरेर अविश्वास फैलाउने नियतले गरिएको हो।