इजरायलको प्रधानमन्त्री बेन्जामिन नेतान्याहुको कार्यालयले सुरक्षा मन्त्रिपरिषद्ले गाजा सहर कब्जा गर्ने योजना अनुमोदन गरेको पुष्टि गरेपछि देशभित्र ठूलो विरोध सुरु भएको छ। शनिबार साँझ तेलअवीव र अन्य शहरहरूमा हजारौं प्रदर्शनकारीहरू युद्धविराम सम्झौता र बन्धकहरूको रिहाइ माग गर्दै सडकमा निस्किएका छन्।
बन्धक परिवारहरूले आम हड्तालको आह्वान गर्दै सरकारको निर्णयलाई आफ्ना प्रियजनहरूको मृत्युको खतरा भएको बताउँदै कडा विरोध गरेका छन्। संयुक्त राष्ट्रसंघले पूर्ण सैन्य कब्जाले गाजाका प्यालेस्टिनी नागरिकमा विनाशकारी असर पर्ने चेतावनी दिएको छ भने बेलायती राजदूतले यसलाई ‘ठूलो गल्ती’ भनेका छन्।
यो विरोध पछिल्ला महिनामा भएको सबैभन्दा ठूलो आन्दोलन मानिएको छ। सेनाले यस योजनाले सैनिक र नागरिक दुवैलाई जोखिममा पार्ने र मानवीय संकट गहिरो बनाउने बताएका थिए।
बन्धक र बेपत्ता परिवार फोरमले युद्ध रोकेर सबै बन्धकको रिहाइ गर्न सरकारलाई आग्रह गरेको छ। योजना अन्तर्गत हमास निशस्त्रीकरण, बन्धक रिहाइ लगायत पाँच उद्देश्य राखिएको छ। यस योजनाप्रति जनताको व्यापक विरोध जारी छ।
