मौसम पूर्वानुमान महाशाखाका अनुसार हाल मनसुनी वायुको प्रभाव कमजोर भए पनि स्थानीय वायुको आंशिक प्रभाव देखिएको छ। यसको कारण कोशी प्रदेशलगायत देशका पहाडी भूभागमा सामान्य बदली, अन्यत्र आंशिक बदली रहेको छ।
दिउँसो कोशी, लुम्बिनी, बागमती र गण्डकी प्रदेशका केही पहाडी क्षेत्रमा मध्यम वर्षा र मधेससहित तराईका केही स्थानमा वर्षाको सम्भावना छ। त्यस्तै, कोशी र बागमती प्रदेशका पहाडी भूभागमा भारी वर्षा हुन सक्ने अनुमान गरिएको छ।
राति देशका अधिकांश पहाडी क्षेत्रमा सामान्य बदली रहनेछ भने लुम्बिनी, सुदूरपश्चिम प्रदेश र तराईका केही स्थानमा मध्यम वर्षा हुने सम्भावना छ।
महाशाखाले कोशी र बागमती प्रदेशका पहाडी भूभागमा भारी वर्षाको सम्भावना रहेकाले स्थानीयवासीलाई आवश्यक सतर्कता अपनाउन अनुरोध गरेको छ।
