नेकपा (माओवादी केन्द्र) राष्ट्रिय महाधिवेशन आयोजक समितिको पूर्ण बैठकले नयाँ पार्टीको एकता राष्ट्रिय सम्मेलन कात्तिक १९ गते गर्ने निर्णय गरेको छ। बैठकले नयाँ दलको नाम नेपाली कम्युनिस्ट पार्टी र चुनाव चिह्न पाँच कुने तारा रहने घोषणा गरेको प्रवक्ता अग्नि सापकोटाले जानकारी दिए।
सापकोटाले भने, “सम्मेलनमा सहभागी प्रतिनिधिहरू सबै दलबीच आपसी सहमति र समझदारीमा कायम हुनेछन्। नयाँ पार्टीले लोकतान्त्रिक गणतन्त्र, राष्ट्रिय स्वाधीनता, सुशासन, सामाजिक न्याय र समाजवादी क्रान्तिको लक्ष्य पूरा गर्ने उद्देश्य राखेको छ।”
उनले नयाँ पार्टीको एकता राष्ट्रिय महाधिवेशन ६ महिनाभित्र सम्पन्न हुने र केन्द्रीय समिति आपसी सहमतिमा गठन गरिने बताए। समितिमा संयोजक र सह–संयोजक पदको व्यवस्था हुने छ।
पार्टीको मार्गनिर्देश माक्सवाद–लेनिनवाद आधारित रहनेछ र नेपाली विशेषताको वैज्ञानिक समाजवाद अपनाइनेछ। पार्टीको तत्कालीन कार्यनीतिमा पुँजीवादी–जनवादी क्रान्तिका उपलब्धिको रक्षा, राष्ट्रिय स्वाधीनताको संरक्षण, सुशासन र आर्थिक–सामाजिक रुपान्तरण समावेश हुनेछ।
सापकोटाका अनुसार पार्टीको आन्दोलन शान्तिपूर्ण हुनेछ, तर आवश्यकता अनुसार संसद, सडक र अन्य मोर्चामा समेत सक्रिय रहने योजना छ।
