धनगढी: कृष्णपुर–२, वाणीमा शनिबार साँझ अचेत अवस्थामा फेला परेका कञ्चनपुरका नरेश सुनारलाई धनगढीस्थित माया मेट्रो अस्पतालले निःशुल्क उपचार गरेको छ। प्रारम्भिक उपचार वाणी अस्पतालमा भएको थियो र त्यसपछि थप उपचारका लागि माया मेट्रोमा पठाइएको थियो।
अस्पतालका पिआर म्यानेजर जगत महतका अनुसार सुनारलाई तीन दिनसम्म आईसीयूमा राखेर उपचार गरिएको थियो। परिवार सम्पर्कमा नभएको र आर्थिक अवस्था कमजोर भएकाले अस्पतालले सामाजिक उत्तरदायित्वका रूपमा सम्पूर्ण उपचार निःशुल्क प्रदान गरेको हो।
उपचारपछि स्वास्थ्यमा सुधार आएपछि अस्पतालले उनलाई सोमवार डिस्चार्ज गरेको छ। सुनारलाई अस्थायी रूपमा ट्राफिक प्रहरी कार्यालय, चटकपुरमा जिम्मा लगाइएको छ।
यस घटनाले अस्पतालको सामाजिक उत्तरदायित्व र समुदायप्रतिको संवेदनशीलता झल्काएको छ, जसले कमजोर आर्थिक अवस्थामा रहेका नागरिकलाई आवश्यक स्वास्थ्य सेवा उपलब्ध गराउने उदाहरण प्रस्तुत गरेको छ।
