कञ्चनपुर: कञ्चनपुरको कृष्णपुर नगरपालिका वडा नं. २ को कार्यालयले भोलिदेखी हुने १६औँ नगरस्तरीय राष्ट्रपति रनिङ सिल्ड प्रतियोगितामा सहभागी दुई सामुदायिक विद्यालयका विद्यार्थीलाई खेल जर्सी वितरण गरेको छ।
वडा कार्यालयले प्रतियोगितामा सहभागी दुई विद्यालय उदय माध्यमिक विद्यालय, बंक र सरस्वती माध्यमिक विद्यालय, बाणी का ४०/४० जना विद्यार्थीलाई जर्सी प्रदान गरेको हो।
कार्यक्रममा वडा नम्बर २ का वडा अध्यक्ष अर्जुन सिंह साउँदले खेलाडीको हौसला र प्रेरणा अभिवृद्धि गर्ने उद्देश्यले जर्सी वितरण गरिएको बताए। उनले खेलकुदले विद्यार्थीको शारीरिक, मानसिक र अनुशासनात्मक विकासमा महत्वपूर्ण भूमिका खेल्ने उल्लेख गर्दै आगामी दिनमा पनि खेलकुद क्षेत्रलाई प्राथमिकतामा राखिने बताए।
सरस्वती माध्यमिक विद्यालय, बाणीका प्रधानाध्यापक अम्बादत्त बडु र उदय माध्यमिक विद्यालय, बंकका प्रधानाध्यापक बम्मन रानाले वडा कार्यालयबाट प्राप्त जर्सीले प्रतियोगितामा सहभागी विद्यार्थीलाई सहज हुने विश्वास व्यक्त गरे। जर्सी वितरणपछि खेलाडीहरू उत्साहित देखिएका छन्।
