💰 सुन घट्यो, चाँदी बढ्यो : बजारमा मिश्रित संकेत

नेपाली बजारमा मंगलबार पनि सुनको मूल्य घटेको छ। नेपाल सुनचाँदी व्यवसायी महासङ्घका अनुसार आज सुन प्रतितोला ९ सय रुपैयाँले घटेर ३ लाख १ हजार ९ सय रुपैयाँ कायम भएको छ। सोमबार सुन ३ लाख २ हजार ८ सय रुपैयाँमा कारोबार भएको थियो भने आइतबार ३ लाख ५ हजार ८ सय रुपैयाँ पुगेको थियो।

महासङ्घका अनुसार आज सुनको मूल्य १० ग्रामको २ लाख ५८ हजार ८३० रुपैयाँ तोकिएको छ। लगातार घट्दो सुनको मूल्यले बजारमा केही सहजता ल्याएको छ।

यता, चाँदीको मूल्य भने बढेको छ। मंगलबार चाँदी प्रतितोला २५ रुपैयाँले बढेर ४ हजार ८ सय ८५ रुपैयाँ कायम भएको छ। सोमबार चाँदी ४ हजार ८ सय ६० रुपैयाँमा कारोबार भएको थियो। आज चाँदी १० ग्रामको मूल्य ४ हजार १ सय ८८ रुपैयाँ निर्धारण गरिएको महासङ्घले जनाएको छ।