काठमाडौँस्थित स्थानीय बजारमा आज सुनचाँदीको मूल्य उल्लेख्य रूपमा बढेको छ। सुनको मूल्य प्रतितोला रु ६ हजारले वृद्धि हुँदा चाँदी पनि रु ३२० ले महँगिएको छ। नेपाल सुनचाँदी व्यवसायी महासङ्घका अनुसार आज छापावाल सुनको मूल्य प्रतितोला रु ३ लाख २ हजार ७०० पुगेको छ भने चाँदीको मूल्य प्रतितोला रु ५ हजार २२० कायम भएको छ।
यसअघि सोमबार सुन प्रतितोला रु २ लाख ९६ हजार ७०० मा कारोबार भएको थियो भने चाँदी रु ४ हजार ९०० मा सीमित थियो। आइतबारको तुलनामा पनि मूल्य क्रमशः बढ्दै आएको देखिन्छ, जसले बजारमा निरन्तर उकालो प्रवृत्ति देखाएको छ।
अन्तरराष्ट्रिय बजारको प्रभाव पनि मूल्य वृद्धिको प्रमुख कारणका रूपमा लिइएको छ। आज अन्तरराष्ट्रिय बजारमा एक औँस सुन ४ हजार ८२८ अमेरिकी डलरमा कारोबार भइरहेको छ भने चाँदी ८० डलरमा किनबेच भइरहेको छ। यसले नेपाली बजारमा पनि प्रत्यक्ष प्रभाव पारेको देखिन्छ।
