बालेन्द्र शाह नेतृत्वको सरकार बनेपछि अमेरिकी दक्षिण तथा मध्य एशिया मामिला हेर्ने सहायक विदेशमन्त्री समीर पल कपुर काठमाडौं आइपुगेका छन्। नयाँ सरकारसँग सम्बन्ध विस्तार गर्ने उद्देश्यसहित गरिएको यो भ्रमणलाई कूटनीतिक रूपमा महत्वपूर्ण मानिएको छ।
सोमबार बिहान त्रिभुवन अन्तर्राष्ट्रिय विमानस्थलमा अवतरण गरेका कपुरले पहिलो भेट रवि लामिछानेसँग गरेका छन्। भेटमा अमेरिका–नेपाल सहकार्यका सम्भावित क्षेत्रबारे छलफल भएको उनले बताएका छन्, यद्यपि विस्तृत विषय खुलाइएको छैन।
दिउँसो उनले अमेरिकी उद्योग प्रमुखहरूसँग नेपालमा आईसीटी क्षेत्रमा लगानी, डिजिटल पूर्वाधार सुदृढीकरण, एआई विकास, साइबर सुरक्षा तथा प्रविधि आदानप्रदानबारे छलफल गरेका थिए।
अमेरिकी विदेश मन्त्रालयका अनुसार कपुरको यो तीन दिने भ्रमणमा परराष्ट्र तथा अर्थमन्त्रीसँग पनि भेट हुने कार्यक्रम छ। तर प्रधानमन्त्रीसँगको भेट अझै अनिश्चित छ। यस भ्रमणलाई नेपाल–अमेरिका सम्बन्ध विस्तारको नयाँ चरणको संकेतका रूपमा हेरिएको छ।
