रोल्पामा भएको जिप दुर्घटनामा १७ जनाको ज्यान गएको छ। रुकुम पूर्वबाट जलजलातर्फ वैशाख पूर्णिमाको मेलामा सहभागी हुन जाँदै गरेको लु१ज ४१६७ नम्बरको बोलेरो जिप भिरबाट करिब ८ सय मिटर तल खसेको प्रहरीले जनाएको छ।
दुर्घटनास्थलमै १७ जनाको मृत्यु भएको प्रहरी प्रधान कार्यालयले पुष्टि गरेको छ। जिपमा मेलामा सहभागी हुन जाने यात्रुहरू सवार रहेको बताइएको छ।
रोल्पाका डीएसपी वीरेन्द्र वीर विश्वकर्मा नेतृत्वको टोली तत्काल उद्धार तथा खोजी कार्यका लागि घटनास्थलमा परिचालित भएको छ। दुर्गम र अप्ठ्यारो भूगोलका कारण उद्धार कार्यमा कठिनाइ भएको जनाइएको छ।
दुर्घटनाको कारणबारे थप अनुसन्धान भइरहेको प्रहरीले जनाएको छ।
