दैलेखको भैरवी गाउँपालिका अध्यक्ष रिताकुमारी शाही चेक अनादर (बैंकिङ कसुर) सम्बन्धी मुद्दामा पक्राउ परेकी छन्। जिल्ला प्रहरी कार्यालय दैलेखका अनुसार उनलाई शुक्रबार नियन्त्रणमा लिइएको हो।
प्रहरीले जनाएको अनुसार शाहीले दिएको ५ लाख ३५ हजार रुपैयाँ बराबरको चेक बैंकमा साट्न खोज्दा रकम नभएपछि चेक बाउन्स भएको थियो। सोही घटनापछि पीडित पक्षले उजुरी दिएपछि उनीविरुद्ध बैंकिङ कसुरसम्बन्धी मुद्दा दर्ता गरिएको हो।
मुद्दा दर्ता भएपछि अदालतबाट अनुमति लिएर अनुसन्धानका लागि उनलाई म्याद थप गरिएको प्रहरीले जनाएको छ। हाल उनलाई वैशाख २५ गतेसम्मका लागि म्याद थप गरी थप अनुसन्धान अघि बढाइएको छ।
शाही २०७९ सालको स्थानीय तह निर्वाचनमा नेपाली कांग्रेसको तर्फबाट भैरवी गाउँपालिका अध्यक्षमा निर्वाचित भएकी थिइन्। घटनासँग सम्बन्धित थप तथ्य र प्रमाण संकलन भइरहेको प्रहरीले जानकारी दिएको छ।
