अमेरिकाको मध्यावधि निर्वाचनमा उल्लेखनीय सफलता हासिल गरेपछि डेमोक्र्याटिक पार्टीले आगामी जनवरीदेखि संसद्का दुवै सदनमा नियन्त्रण कायम गर्ने भएको छ। यससँगै राष्ट्रपति डोनाल्ड ट्रम्पको बाँकी दुई वर्षको कार्यकाल थप चुनौतीपूर्ण बन्ने देखिएको छ। डेमोक्र्याटहरूले अब ट्रम्प प्रशासनमाथि संसदीय निगरानी, अनुसन्धान र राजनीतिक दबाब बढाउन सक्नेछन्।
निर्वाचन परिणामपछि प्रतिनिधिसभाका डेमोक्र्याटिक नेता हाकिम जेफ्रिजले यसलाई ‘अमेरिकाको महान् पुनरागमनको सुरुवात’ भनेका छन्। चुनावी अभियानका क्रममा डेमोक्र्याटहरूले सरकारी भ्रष्टाचारको अनुसन्धान, स्वास्थ्य सेवा तथा खाद्यान्न र इन्धनको मूल्य घटाउने र इरानसँगको युद्ध अन्त्य गर्ने प्रतिबद्धता जनाएका थिए।
दुवै सदनमा बहुमत पाएसँगै डेमोक्र्याटहरूले ट्रम्प परिवार, सरकारी निकाय, गृह सुरक्षा मन्त्रालय र अध्यागमनसम्बन्धी विषयमा अनुसन्धान अघि बढाउन सक्नेछन्। त्यस्तै, राष्ट्रपति नियुक्त गर्ने मन्त्री तथा संघीय न्यायाधीशहरूको अनुमोदन प्रक्रियामा पनि उनीहरूले प्रभाव पार्न सक्नेछन्।
यद्यपि, बहुमत हासिल गर्दैमा डेमोक्र्याटहरूले सबै योजना कार्यान्वयन गर्न सक्ने अवस्था छैन। ह्वाइट हाउसमा रिपब्लिकन राष्ट्रपति ट्रम्प रहेकाले संसद्बाट पारित विधेयकमा उनले भिटो प्रयोग गर्न सक्छन्। यस्तो भिटो असफल बनाउन दुवै सदनमा दुईतिहाइ बहुमत आवश्यक पर्छ।
त्यस्तै, ट्रम्पविरुद्ध महाभियोग प्रक्रिया अघि बढाउन सक्ने अधिकार प्रतिनिधिसभासँग भए पनि उनलाई पदमुक्त गर्न सिनेटमा ६७ मत आवश्यक हुन्छ। डेमोक्र्याटहरूसँग त्यस्तो बहुमत छैन।
स्वास्थ्य सेवा, इरान नीति, इजरायललाई सैन्य सहायता र कृत्रिम बुद्धिमत्ता (एआई) नियमनजस्ता विषयमा पार्टीभित्रै मतभेदसमेत चुनौती बन्न सक्नेछ। त्यसैले ट्रम्पविरोधी मतबाट प्राप्त जितलाई जनताको पूर्ण समर्थनका रूपमा बुझ्न नहुने नेताहरूको भनाइ छ।
अब डेमोक्र्याटहरूका लागि ट्रम्प प्रशासनमाथि निगरानी बढाउनुका साथै महँगी, स्वास्थ्य सेवा र जनजीविकासँग जोडिएका समस्या समाधान गर्नु मुख्य चुनौती हुनेछ।
