धनगढीमा पुस २१ देखि सातौँ खप्तड गोल्डकप, विजेतालाई २१ लाख पुरस्कार

Image
Nisarga Hospital

सुदूरपश्चिमको प्रतिष्ठित फुटबल प्रतियोगिता ‘सुदूरपश्चिम खप्तड गोल्डकप’को सातौँ संस्करण आगामी पुस २१ गतेदेखि धनगढीमा आयोजना हुने भएको छ । सुदूरपश्चिम–११ स्पोर्ट्स क्लबले आइतबार पत्रकार सम्मेलन आयोजना गर्दै प्रतियोगिताको मिति, पुरस्कार राशि र तयारीबारे जानकारी गराएको हो ।

CP Hospital Dhangadhi

आयोजकका अनुसार धनगढी रंगशालामा पुस २१ गतेदेखि माघ १ गतेसम्म सञ्चालन हुने प्रतियोगितामा अन्तर्राष्ट्रिय टोलीसहित बढीमा १० टोलीको सहभागिता रहनेछ । प्रतियोगितामार्फत सुदूरपश्चिममा फुटबल खेलको विकास र विस्तार गर्नुका साथै प्रदेशको खेल पहिचानलाई राष्ट्रिय तथा अन्तर्राष्ट्रियस्तरमा स्थापित गर्ने लक्ष्य राखिएको छ ।

क्लबका महासचिव प्रकाश शाहीले स्थानीय प्रतिभावान खेलाडीलाई राष्ट्रिय तथा अन्तर्राष्ट्रिय खेलाडीसँग प्रतिस्पर्धा गर्ने अवसर प्रदान गर्न प्रतियोगिता आयोजना गर्न लागिएको बताए । २०७३ सालदेखि निरन्तर सञ्चालन हुँदै आएको खप्तड गोल्डकपलाई यस वर्ष थप व्यवस्थित, भव्य र अन्तर्राष्ट्रियस्तरको बनाउने तयारी भइरहेको उनले जानकारी दिए । प्रतियोगिताले युवामा फुटबलप्रतिको आकर्षण बढाउनुका साथै नयाँ खेल प्रतिभा उत्पादनमा समेत सहयोग पुग्ने अपेक्षा गरिएको छ ।

प्रतियोगिताको विजेता टोलीले २१ लाख रुपैयाँ र उपविजेताले ११ लाख रुपैयाँ नगद पुरस्कार प्राप्त गर्नेछन् । यस्तै, प्रतियोगिताको उत्कृष्ट खेलाडीलाई मोटरसाइकल वा स्कुटर प्रदान गरिने आयोजकले जनाएको छ । विभिन्न विधाका उत्कृष्ट खेलाडीलाई जनही २५ हजार रुपैयाँ तथा प्रत्येक खेलका उत्कृष्ट खेलाडी अर्थात् ‘म्यान अफ द म्याच’लाई १० हजार रुपैयाँ प्रदान गरिनेछ । विजेता तथा उपविजेता टोलीका खेलाडी र पदाधिकारीलाई ट्रफी, मेडल र प्रमाणपत्रसमेत प्रदान गरिनेछ ।

क्लबका अध्यक्ष योगेन्द्र चन्दले प्रतियोगिता सफल बनाउन प्रदेश सरकार, स्थानीय तह, निजी क्षेत्र, उद्योगी–व्यवसायी, खेलकुदसम्बद्ध संघसंस्था तथा खेलप्रेमी सबैको सहयोग आवश्यक रहेको बताए ।

खप्तड गोल्डकपले सुदूरपश्चिमको फुटबल विकासमा योगदान पुर्‍याउनुका साथै खेल पर्यटन प्रवर्द्धन, स्थानीय व्यवसायको चलायमानता र आर्थिक गतिविधि बढाउनसमेत महत्वपूर्ण भूमिका खेल्ने आयोजकको विश्वास छ ।