राष्ट्रिय जेनजी नागरिक अभियानले पेट्रोलियम पदार्थको चरम मूल्यवृद्धिविरुद्ध सरकार र नेपाल आयल निगमलाई २४ घण्टे अल्टिमेटम दिएको छ। राजधानीमा आयोजित पत्रकार सम्मेलनमार्फत अभियानका संयोजक सुनिल सिंहले तत्काल मूल्य समायोजन नगरे आयल निगम घेराउ गर्ने चेतावनी दिएका हुन्। उनले महँगीको भारले जनतालाई थिचिएको भन्दै सरकारप्रति तीव्र असन्तोष व्यक्त गरे।
सह–संयोजक अजय सोडारीले छिमेकी India मा पेट्रोल सस्तो हुँदा नेपालमा अत्यधिक महँगो हुनु लाजमर्दो भएको बताए। उनका अनुसार पेट्रोलको मूल्य १५७ बाट २१९ र डिजेल/मट्टितेल १४२ बाट २३७ पुगेको छ, जसले जनजीवन प्रभावित पारेको छ।
अभियानका अन्य नेताहरूले कर छुटको नाममा जनतालाई भ्रममा राखिएको आरोप लगाउँदै मूल्य स्थिर नराखे देशभर महँगी झन् बढ्ने चेतावनी दिएका छन्। साथै, कूटनीतिक कमजोरी र राष्ट्रिय मुद्दामा मौनता देखिएको भन्दै आक्रोश व्यक्त गरिएको छ।
आन्दोलनकारीहरूले तत्काल मूल्य समायोजन नभए कडा संघर्षमा उत्रिने घोषणा गरेका छन्।
