बङ्गालको खाडीमा विकसित चक्रवात “मोन्था” हाल भारतको छत्तिसगढ वरिपरि न्यूनचापीय प्रणालीमा परिणत भएसँगै नेपालमा यसको प्रभाव गएरातिबाट घट्न सुरु भएको छ। मौसम पूर्वानुमान महाशाखाले जानकारी दिएको अनुसार, पश्चिमी वायु र अरब सागरमा बनेको न्यूनचापीय प्रणालीले पनि आंशिक रूपमा नेपालमा प्रभाव पारिरहेको छ।
देशका अधिकांश भूभागमा बदली छ। कोशी प्रदेशमा पूर्ण बदली रहेको छ भने बाँकी प्रदेशमा आंशिकदेखि सामान्य बदली देखिएको छ। कोशी, बागमती र गण्डकी प्रदेशका केही स्थानमा हल्का देखि मध्यम वर्षा भइरहेको छ।
दिउँसो कोशी, मधेस र बागमती प्रदेशमा सामान्य बदली रहने छ भने अन्य प्रदेशमा आंशिक बदली रहने सम्भावना छ। कोशी प्रदेशका थोरै स्थानमा र मधेस, बागमती तथा गण्डकीका पहाडी भूभागका केही स्थानमा मध्यम वर्षा हुन सक्छ। उच्च पहाडी तथा हिमाली भूभागमा हल्का हिमपातको पनि सम्भावना रहेको छ।
राति कोशी र मधेस प्रदेश सामान्यतया बदली रहनेछ, बाँकी प्रदेशमा आंशिक बदली रहने छ। कोशी, बागमती र गण्डकी प्रदेशका पहाडी र हिमाली भूभागका थोरै स्थानमा हल्का वर्षासहित हिमपात हुने सम्भावना छ।
यसरी “मोन्था” चक्रवातको प्रभाव नेपालमा क्रमिक रूपमा कम हुँदै गएको मौसम विभागले जनाएको छ।
