🕉️ आज स्वस्थानी व्रत समापन: श्रद्धा, विश्वास र मनोकामनाको पूर्णता

सुदूरखबर संवाददाता २०८२ माघ १८, आईतवार ०७:४२

मिनेट274जना

माघ शुक्ल पूर्णिमाका दिन आज एक महिना लामो स्वस्थानी व्रत विधिपूर्वक समापन हुँदैछ। पौष शुक्ल पूर्णिमादेखि वैदिक सनातन हिन्दू धर्मावलम्बीले घरघरमा सुरु गरेको स्वस्थानी व्रत आज विशेष पूजा, अर्घ्य र जाग्रामसहित टुंग्याइँदैछ। देशभरका भक्तजनले नित्य मध्याह्नकालमा पार्वतीसहित महादेवको पूजा गर्दै व्रत पूरा गरेका हुन्।

यसैसँग स्कन्द पुराणअन्तर्गत केदार खण्डको माघ माहात्म्यमा आधारित स्वस्थानी कथा वाचन–श्रवण पनि आजैदेखि अन्त्य गरिँदैछ। व्रत समापनका अवसरमा १०८ जनै, सुपारी, पान, फूल, रोटी, अक्षता, फलफूल, धुप, बत्ती, नैवेद्यलगायत सामग्री चढाई भगवतीलाई अर्घ्य दिने विधि रहेको छ। चढाइएका प्रसादबाट आठ–आठ भाग पतिको नाममा अर्पण गरी बाँकी पवित्र नदीमा विसर्जन गरिन्छ।

रातभर जाग्राम बसी देवीको माहात्म्य सुन्ने–सुनाउने परम्परा छ। यसो गरेमा मनोकामना पूरा हुने धार्मिक विश्वास रहिआएको छ। स्वस्थानीको शाब्दिक अर्थ ‘आफू बसेको स्थानकी देवी’ हो। उत्तरायणपछिको समय ध्यान, योग र आत्मसाधनाका लागि उपयुक्त मानिने भएकाले यो व्रत विशेष महत्वको मानिन्छ।

कथाअनुसार स्वस्थानी व्रतले बिछोड भएका जोडीको पुनर्मिलन, रोगव्याध निवारण र इच्छित जीवनसाथी प्राप्त हुने विश्वास छ। आज मध्याह्नपछि पूजा सम्पन्न गरी राति जाग्राम र बिहीबार बिहान नदीमा फूलपाती सेलाएपछि यस वर्षको स्वस्थानी व्रत औपचारिक रूपमा समापन हुनेछ। यसैदिन शालिनदीमा माधवनारायण व्रत पनि अश्वमेध यज्ञसहित सम्पन्न हुँदैछ।