फागुन २१ गते हुने प्रतिनिधि सभा निर्वाचनका लागि आज मध्यरातिदेखि मौन अवधि सुरु भएको छ। मौन अवधि सुरु भएपछि कुनै पनि दल, उम्मेदवार वा व्यक्तिले प्रचार–प्रसार, भोट माग्न वा मतदातामा प्रभाव पार्न पाइँदैन। यस अवधिमा सभा, गोष्ठी, कार्यशाला, सामाजिक सञ्जाल वा अन्य कुनै माध्यमबाट निर्वाचन प्रचार गर्न प्रतिबन्ध छ।
मौन अवधि मतदान सकिनेसम्म लागू रहनेछ। यसको मुख्य उद्देश्य निर्वाचनलाई शान्त, सुरक्षित र विवादविहीन वातावरणमा सम्पन्न गर्नु हो। यसले उम्मेदवारबीच स्वच्छ प्रतिस्पर्धा सुनिश्चित गर्ने तथा मतदातालाई स्वतन्त्र र उत्साहित भएर मतदान गर्न प्रेरित गर्ने विश्वास गरिएको छ।
निर्वाचन आचारसंहिताअनुसार, मतदान केन्द्रको ३०० मिटर वरपर राखिएका सबै प्रचार सामग्री हटाउन निर्वाचन अधिकृतको कार्यालयले व्यवस्था गर्नेछ। राजनीतिक दलका पदाधिकारी, भ्रातृ संगठन र सम्बन्धित निकायले पनि यस अवधिमा कुनै प्रचार–प्रसार वा मत माग्ने गतिविधि गर्न पाउने छैनन्।
मुख्य निर्वाचन आयुक्त रामप्रसाद भण्डारीका अनुसार, सामाजिक सञ्जाल, छापा र अनलाइन मार्फत पनि प्रचार सामग्री पोष्ट, शेयर वा प्रचार गर्न प्रतिबन्ध छ। मौन अवधिले निर्वाचनलाई निष्पक्ष, सुरक्षित र लोकतान्त्रिक रूपमा सम्पन्न गराउने विश्वास गरिएको छ।
#Election2026 #SilentPeriod #NepalElection #VotingRights #Democracy #CleanElection #VoteSafely
