देशभर मनसुनी वायुको प्रभाव कायम रहँदा मौसम पूर्वानुमान महाशाखाले आज पनि विभिन्न प्रदेशमा वर्षा जारी रहने जनाएको छ। महाशाखाका अनुसार मनसुनको न्यून चापीय रेखा पूर्वी नेपालमा सरदर स्थानको आसपास र पश्चिम नेपालमा सरदरभन्दा उत्तरतर्फ रहेकाले देशभर सामान्यदेखि पूर्ण बदलीको अवस्था रहेको छ।
हाल बागमती, गण्डकी, कर्णाली र सुदूरपश्चिम प्रदेशका केही स्थान तथा लुम्बिनी र मधेस प्रदेशका एक–दुई स्थानमा हल्कादेखि मध्यम वर्षा भइरहेको छ। दिउँसो हिमाली तथा पहाडी भूभागका धेरै स्थानमा चट्याङसहित मध्यम वर्षाको सम्भावना रहेको छ भने लुम्बिनी र सुदूरपश्चिमका तराईका धेरै स्थानमा पनि वर्षा हुने अनुमान गरिएको छ।
महाशाखाले लुम्बिनी र सुदूरपश्चिमका पहाडी तथा तराई क्षेत्र, साथै बागमती, गण्डकी र कर्णालीका पहाडी भूभागका एक–दुई स्थानमा भारी वर्षाको सम्भावना रहेको जनाएको छ।
राति पनि देशका अधिकांश हिमाली, पहाडी तथा केही तराई क्षेत्रमा चट्याङसहित वर्षा हुने सम्भावना छ। बागमती, गण्डकी र लुम्बिनी प्रदेशका केही स्थानमा राति पनि भारी वर्षा हुन सक्ने भएकाले नदी, खोला आसपासका बासिन्दा तथा पहिरोको जोखिम रहेका क्षेत्रमा विशेष सतर्कता अपनाउन मौसमविद्ले आग्रह गरेका छन्।
