विश्व मौसम संगठन (WMO)को ताजा प्रतिवेदनले आगामी पाँच वर्ष विश्वका लागि जलवायु संकटको गम्भीर संकेत देखाएको छ। सन् २०२५–२०२९ को अवधिमा औसत तापक्रम १.९ डिग्री सेल्सियसले बढ्ने अनुमान गरिएको छ, जुन औद्योगिक क्रान्तिपूर्वको स्तरभन्दा निकै उच्च हो।
रिपोर्टअनुसार यो अवधिमा कम्तिमा एक वर्ष १.५ डिग्री पार गर्ने सम्भावना ८६ प्रतिशत छ। पाँच वर्षको औसत तापक्रम सोही सीमा नाघ्ने सम्भावना ७० प्रतिशत पुगेको छ। यो गत वर्षको तुलनामा २६ प्रतिशतले वृद्धि हो।
तातो लहर, भीषण वर्षा, हिमनदी पग्लन, समुद्री सतहको वृद्धि, तथा सूखा–बाढीजस्ता चरम मौसमी घटनाहरूको जोखिम उच्च हुने चेतावनी दिइएको छ। आर्कटिक क्षेत्रमा तापमान वृद्धि विश्व औसतभन्दा ३.५ गुणा बढी हुनेछ, जसले समुद्री बरफ झनै घटाउनेछ।
दक्षिण एशियामा विशेष गरी नेपाल जस्ता हिमाली राष्ट्रहरूमा यसको गम्भीर असर पर्नेछ। हिमनदी पग्लँदा जलस्रोत, सिँचाइ, कृषि र बासस्थान जोखिममा पर्नेछ। इसिमोडका अनुसार तापमान यसरी बढिरहेमा नेपाल र भुटानले हिमालय क्षेत्रको ७५–८०% हिउँ गुमाउन सक्छन्।
WMO ले विश्व तापक्रम नियन्त्रण गर्न तुरुन्तै नवीकरणीय ऊर्जा, पूर्वतयारी योजना र दिगो वातावरणीय रणनीतिमा लगानी बढाउन आग्रह गरेको छ। अन्यथा, सन् २०३० सम्म विश्व अर्थतन्त्रलाई २.४ ट्रिलियन डलर बराबरको क्षति पुग्न सक्ने आँकलन गरिएको छ।
