कोरोना महामारीका बेला भारतबाट फर्किने नागरिक व्यवस्थापनका लागि निर्माण गरिएका कञ्चनपुर जिल्लाका ‘होल्डिङ सेन्टर’ हाल प्रयोगविहीन बनेका छन्। भीमदत्त नगरपालिका–१८ सालघारीमा करिब २९ करोड २५ लाख रुपैयाँ लागतमा एक हजार बेड क्षमताका संरचना निर्माण गरिएको थियो।
तर अहिले ती संरचना उपयोगविहीन हुँदा जीर्ण बन्दै गएको भन्दै स्थानीयवासीले चिन्ता व्यक्त गरेका छन्। उनीहरूले यसलाई लागूऔषध पुनःस्थापना केन्द्र, क्षयरोग उपचार केन्द्र वा अन्य स्वास्थ्य सेवामा प्रयोग गर्न सुझाव दिएका छन्।
प्रशासनले भने उक्त संरचनालाई उपयोगमा ल्याउने विभिन्न विकल्पबारे छलफल भइरहेको जनाएको छ। अध्ययन समितिले पनि विपद् व्यवस्थापन, पुनःस्थापना केन्द्र तथा स्वास्थ्य सेवा विस्तारका लागि प्रयोग गर्न सकिने प्रस्ताव अघि सारेको छ।
करोडौँको सार्वजनिक लगानीमा बनेका यी संरचना लामो समयदेखि निष्क्रिय रहँदा सरकारी सम्पत्तिको उचित उपयोगबारे प्रश्न उठिरहेको छ। अब यसलाई प्रभावकारी रूपमा सञ्चालन गर्न ठोस निर्णयको आवश्यकता देखिएको छ।
