पोखरा अन्तर्राष्ट्रिय विमानस्थलबाट पहिलोपटक नियमित अन्तर्राष्ट्रिय हवाई सेवा सञ्चालन हुने भएको छ। आगामी भदौ ७ गतेदेखि यूएईको Flydubai ले पोखरा–दुबई नियमित उडान सुरु गर्ने तयारी गरेको छ।
नेपाल नागरिक उड्डयन प्राधिकरणले फ्लाइ दुबईलाई उडान अनुमति प्रदान गरिसकेको जानकारी पोखरा महानगरपालिकाका प्रमुख Dhanraj Acharya ले दिएका छन्। प्राधिकरणका अनुसार एयरलाइन्सले १६७ सिट क्षमताको बोइङ ७३७ विमानमार्फत सेवा सञ्चालन गर्नेछ।
निर्धारित तालिकाअनुसार विमान साँझ ६:१५ बजे पोखरा अन्तर्राष्ट्रिय विमानस्थलमा अवतरण गर्नेछ भने ७:१५ बजे दुबईका लागि प्रस्थान गर्नेछ। पोखरा–दुबई उडानको अवधि करिब पाँच घण्टा रहने बताइएको छ।
नागरिक उड्डयन प्राधिकरणका अनुसार फ्लाइ दुबईले प्रारम्भिक चरणमा एक महिनाका लागि उडान अनुमति लिएको छ। यो सेवा सफल भएमा पोखरा अन्तर्राष्ट्रिय विमानस्थलको अन्तर्राष्ट्रिय सञ्चालन थप विस्तार हुने अपेक्षा गरिएको छ।
फ्लाइ दुबईको नियमित उडान सुरु भएसँगै पर्यटन प्रवर्द्धन, वैदेशिक रोजगारीमा जाने नेपाली तथा व्यवसायिक यात्रुलाई प्रत्यक्ष लाभ पुग्ने विश्वास गरिएको छ। साथै, पोखराबाट अन्तर्राष्ट्रिय गन्तव्यमा सिधा हवाई पहुँच विस्तार हुने भएकाले यसलाई पोखरा र समग्र गण्डकी प्रदेशका लागि महत्वपूर्ण उपलब्धिका रूपमा हेरिएको छ।
