कञ्चनपुरको भीमदत्त नगरपालिका–१२ स्थित महाकाली नदीमा निर्माणाधीन चार लेन पक्की पुलको उत्तरतर्फको गाइडबण्ड पुनर्निर्माणका लागि नेपाली सेना पुनः परिचालन गरिएको छ । गत वर्ष बाढीले करिब ३०० मिटर गाइडबण्ड क्षति गरेपछि सरकारले तीन महिनाका लागि क्षेत्रलाई सङ्कटग्रस्त घोषणा गरी सेनालाई काममा खटाएको थियो ।
यस वर्ष पनि आसन्न वर्षात्का सम्भावित जोखिम न्यूनीकरण गर्न पुनः सेना परिचालन गरिएको हो । सडक डिभिजन कार्यालय कञ्चनपुरको अगुवाइमा सैनिक जनशक्ति परिचालन गरिएको छ भने सुदूरपश्चिम पृतनाअन्तर्गत विभिन्न युनिटबाट थप टोली आउने क्रम जारी छ ।
श्री नं २५ बाहिनी अड्डा भगतपुर ब्यारेकका सहायकरथी बिजितराज रेग्मी नेतृत्वको प्राविधिक टोलीले स्थलको अवस्था निरीक्षण गरेको छ । बाहिनीले तत्काल क्षति न्यूनीकरण, पुल संरक्षण र तटीय बस्ती जोगाउने काम अघि बढाएको जनाएको छ ।
सडक डिभिजन प्रमुख राजेशकुमार यादवका अनुसार मेसिनरी तथा प्राविधिक सहयोग सडक डिभिजनले उपलब्ध गराउँदै आएको छ भने जनशक्ति सेनाले व्यवस्थापन गरेको छ । चार लेनको पुलको ९५ प्रतिशत निर्माण पूरा भए पनि गाइडबण्डको डिजाइन र भेरियसन अर्डर विवादका कारण निर्माण कम्पनी कामबाट बाहिरिएको छ । मुद्दा हाल मध्यस्थ न्यायाधिकरणमा विचाराधीन छ ।
