पाकिस्तानले अफगानिस्तानको सीमाभित्र रहेका तीन आतंककारी अखडालाई लक्षित गर्दै सैन्य कारबाही गरेको दाबी गरेको छ। पाकिस्तानका अनुसार खैबर पख्तुनख्वाको बाजौर जिल्लामा सुरु गरिएको अपरेशनपछि अफगानिस्तानको पक्तिया, पक्तिका र कुनार प्रान्तमा रहेका आश्रयस्थलहरूमा हवाई तथा सैन्य आक्रमण गरिएको थियो। यस कारबाहीमा कुल २९ जना आतंककारी मारिएको र ठूलो परिमाणमा हतियार तथा गोलाबारुद नष्ट गरिएको दाबी गरिएको छ।
पाकिस्तानका सूचना मन्त्री अताउल्लाह तरारका अनुसार हालै कराँचीस्थित सिन्ध रेन्जर्स मुख्यालयमा भएको आत्मघाती आक्रमणको जवाफस्वरूप यो अपरेशन सञ्चालन गरिएको हो। उक्त आक्रमणमा चार सुरक्षाकर्मीको मृत्यु भएको थियो भने त्यसको जिम्मेवारी जमात–उल–अहरारले लिएको थियो। पाकिस्तानले कारबाहीमा तहरीक–ए–तालिबान पाकिस्तान (TTP) का प्रमुख कमाण्डर खान फरोश पनि मारिएको जनाएको छ।
पाकिस्तानले अफगानिस्तानको तालिबान सरकारले TTP लाई संरक्षण दिँदै आएको आरोप दोहोर्याउँदै आफ्ना नागरिकको सुरक्षामा कुनै सम्झौता नगर्ने चेतावनी दिएको छ। यद्यपि अफगान तालिबानले यसअघि पनि पाकिस्तानका सीमापार आक्रमणलाई सार्वभौमिकताको उल्लङ्घन भन्दै विरोध गर्दै आएको छ।
सन् २०२१ मा अफगानिस्तानमा तालिबान पुनः सत्तामा आएपछि पाकिस्तान–TTP द्वन्द्व झन् चर्किएको छ। पछिल्ला महिनाहरूमा सीमापार सैन्य कारबाही र आरोप–प्रत्यारोपका कारण दुई देशबीचको सुरक्षा तनाव थप बढ्दै गएको छ।
