अन्तर्राष्ट्रिय बजारमा मंगलबार सुनको मूल्य एक प्रतिशतभन्दा बढीले घट्दै सन् २००८ यताकै सबैभन्दा ठूलो मासिक गिरावटतर्फ पुगेको छ। अमेरिकाले उच्च महँगी नियन्त्रणका लागि ब्याजदर बढाउन सक्ने अपेक्षा र बलियो अमेरिकी डलरका कारण बहुमूल्य धातुको मूल्यमा दबाब परेको हो।
स्पट सुनको मूल्य १.५ प्रतिशतले घटेर प्रतिऔंस ३,९५६.९२ डलरमा झरेको छ भने अगस्ट डेलिभरीका लागि अमेरिकी सुनको फ्युचर्स मूल्य १.७ प्रतिशतले घटेर ३,९६९.३० डलर कायम भएको छ। चालु महिनामा मात्रै सुनको मूल्य १२.७ प्रतिशतले घटेको छ, जुन लगातार चौथो मासिक गिरावट हो।
विश्लेषकहरूका अनुसार इरान–अमेरिका तनाव, ऊर्जा मूल्यवृद्धिबाट सिर्जिएको महँगीको दबाब तथा अमेरिकी फेडरल रिजर्भले ब्याजदर बढाउने सम्भावनाले सुनको आकर्षण घटाएको छ। सीएमई फेडवाच टुलले सेप्टेम्बरमा ब्याजदर बढ्ने सम्भावना ६४ प्रतिशत रहेको देखाएको छ।
सुनसँगै अन्य बहुमूल्य धातुको मूल्य पनि ओरालो लागेको छ। स्पट चाँदी २ प्रतिशत, प्लाटिनम १.१ प्रतिशत र प्यालेडियम ०.४ प्रतिशतले घटेको छ। विश्लेषक एडवर्ड मेयरले वर्षको दोस्रो आधामा सुन प्रतिऔंस ३,५०० देखि ४,४०० डलरको दायरामा कारोबार हुने अनुमान गरेका छन्।
