अर्जेन्टिनाका कप्तान लियोनेल मेसीले फिफा विश्वकप इतिहासमा अर्को ऐतिहासिक उपलब्धि हासिल गरेका छन्। केप भर्डेविरुद्ध अन्तिम–१६ प्रवेशका लागि भएको खेलमा गोल गर्दै उनले विश्वकपका लगातार आठ खेलमा गोल गर्ने पहिलो खेलाडी बनेका हुन्।
मेसीको यो गोल यात्रा सन् २०२२ को विश्वकपबाट सुरु भएको हो। उनले अस्ट्रेलियाविरुद्ध गोल गरेपछि नेदरल्यान्ड्सविरुद्ध एक गोल र एक असिस्ट, क्रोएसियाविरुद्ध एक गोल र एक असिस्ट तथा फाइनलमा फ्रान्सविरुद्ध दुई गोल गरेका थिए।
सन् २०२६ विश्वकपमा पनि उनले उत्कृष्ट प्रदर्शनलाई निरन्तरता दिएका छन्। अल्जेरियाविरुद्ध ह्याट्रिक, अस्ट्रियाविरुद्ध दुई गोल, जोर्डनविरुद्ध एक गोल र केप भर्डेविरुद्ध अर्को गोल गर्दै उनले लगातार आठ विश्वकप खेलमा गोल गर्ने विश्वकै पहिलो खेलाडीको कीर्तिमान बनाएका हुन्।
केप भर्डेविरुद्धको गोलसँगै मेसीले विश्वकपमा आफ्नो व्यक्तिगत गोलसंख्या २० पुर्याएका छन्। यससँगै उनी २०२६ विश्वकपको गोल्डेन बुट दौडमा पनि अग्रस्थानमा पुगेका छन्।
३९ वर्षको उमेरमा पनि मेसीले विश्व फुटबलमा नयाँ इतिहास रच्दै आफ्नो प्रभाव कायम राखेका छन्। लगातार आठ विश्वकप खेलमा गोल गर्ने उनको उपलब्धिलाई आधुनिक फुटबलकै दुर्लभ व्यक्तिगत कीर्तिमानका रूपमा हेरिएको छ।
