ब्राजिलका स्टार फरवार्ड नेयमारले अन्तर्राष्ट्रिय फुटबलबाट संन्यासको घोषणा गरेका छन्। फिफा विश्वकप २०२६ को अन्तिम १६ मा नर्वेसँग २–१ ले पराजित हुँदै ब्राजिल प्रतियोगिताबाट बाहिरिएपछि ३४ वर्षीय नेयमारले राष्ट्रिय टोलीसँगको आफ्नो यात्रा टुंग्याएका हुन्।
न्यू जर्सीस्थित मेटलाइफ स्टेडियममा आइतबार राति भएको खेल सकिएलगत्तै भावुक बनेका नेयमार मैदानमै रोएका थिए। ब्राजिल सन् १९९० यता पहिलो पटक विश्वकपको अन्तिम १६ बाटै बाहिरिएको हो। खेलमा नर्वेका एर्लिङ हालान्डले दुई गोल गरे भने नेयमारले इन्जुरी समयमा पेनाल्टीमार्फत सान्त्वना गोल फर्काएका थिए।
‘मैले धेरै प्रयास गरेँ, तर अब यो यात्रा यहीं समाप्त भयो,’ नेयमारले ग्लोबोसँग भने। सन् २०१० मा यही मेटलाइफ स्टेडियमबाट ब्राजिलका लागि डेब्यु गरेका उनले पहिलो अन्तर्राष्ट्रिय गोल पनि त्यही मैदानमा गरेका थिए।
चोटका कारण पछिल्ला वर्ष चुनौतीपूर्ण बने पनि नेयमारले ब्राजिलका लागि १३० खेलमा कीर्तिमानी ८० गोल गर्दै पेलेको ७७ गोलको कीर्तिमान पार गरेका छन्। उनी चार फरक विश्वकपमा गोल गर्ने पेलेपछि दोस्रो ब्राजिलियन खेलाडी पनि बने।
हारपछि मुख्य प्रशिक्षक कार्लो एन्सेलोटीले टोलीमा नयाँ चक्र सुरु गर्ने समय आएको भन्दै यस हारबाट पाठ सिकेर नयाँ योजनासहित अघि बढ्ने बताएका छन्।
