पाकिस्तानको ब्रोड पिक हिमालमा हिमपहिरोमा परी ज्यान गुमाएका विश्व कीर्तिमानी नेपाली पर्वतारोही निर्मल पुर्जा ‘निम्स दाइ’को पार्थिव शरीर अझै नेपाल ल्याइएको छैन। उनीसँगै निधन भएका अन्य आरोहीको शव काठमाडौं ल्याइए पनि पुर्जाको शव इस्लामाबादमै रहेको बताइएको छ।
साउन १४ गते ८ हजार ४७ मिटर अग्लो ब्रोड पिकको क्याम्प–२ र ३ बीचमा गएको हिमपहिरोमा पुर्जासहित ६ नेपाली र ४ विदेशी आरोहीको मृत्यु भएको थियो।
पुर्जाको शव नेपाल नल्याइएको विषयमा सरकारको आलोचना भइरहेको छ। पर्वतारोहण क्षेत्रका व्यक्तिहरूले विश्वस्तरमा नेपालको नाम उँचो बनाएका आरोहीको अन्तिम सम्मानमा सरकारले पर्याप्त पहल नगरेको आरोप लगाएका छन्।
परराष्ट्र मन्त्रालयका प्रवक्ता लोकबहादुर पौडेल क्षेत्रीले पुर्जाकी श्रीमतीसँग बेलायती पासपोर्ट भएकाले शव बेलायत लैजान खोजेको र नेपाल ल्याउन आफन्तबाट औपचारिक अनुरोध नआएकाले समस्या भएको बताएका छन्। पर्यटन विभागकी निर्देशक निशा थापा राउतले पनि परिवारको अनुमतिबिना शव ल्याउन नसकिने बताएकी छन्।
तर, गैरआवासीय नेपाली संघ बेलायतका अध्यक्ष राजेन्द्र पुडासैनीले सरकारले सक्रियता देखाएको भए परिवारले नेपाल ल्याउन अनुमति दिने दाबी गरेका छन्।
म्याग्दीको दाना जन्मिएका पुर्जाले १६ वर्ष ब्रिटिस गोर्खा सैनिकका रूपमा सेवा गरेका थिए। उनले विश्वका आठ हजार मिटरभन्दा अग्ला १४ वटै हिमाल आरोहण गरी विश्व कीर्तिमान बनाएका थिए। उनको अन्तिम सम्मानका लागि शव स्वदेश ल्याउन सरकारमाथि दबाब बढिरहेको छ।
