अमेरिकी राष्ट्रपति डोनाल्ड ट्रम्पले दक्षिण कोरियासँग सुरु हुन लागेको १० दिने संयुक्त सैन्य अभ्यास घटाउन पेन्टागनलाई निर्देशन दिएका छन्। उच्च खर्च र इरानविरुद्ध अमेरिकी कदममा दक्षिण कोरियाले साथ नदिएको विषयलाई ट्रम्पले निर्णयको कारण बताएका छन्।
ट्रम्पले आइतबार सामाजिक सञ्जाल ‘ट्रुथ सोसल’मार्फत अभ्यास पूर्ण रूपमा रद्द गर्न ढिला भइसके पनि आफू यसप्रति खुसी नरहेको उल्लेख गरेका छन्। उनले उत्तर कोरियाली नेता किम जोङ उनसँग आफ्नो सम्बन्ध अत्यन्त राम्रो रहेको दाबी गर्दै सैन्य अभ्यासले उत्तर कोरियालाई अनावश्यक र शत्रुतापूर्ण सन्देश दिने बताएका छन्।
‘उल्छी फ्रिडम सिल्ड’ नामक वार्षिक सैन्य अभ्यास अगस्ट १७ देखि २७ सम्म सञ्चालन हुने तालिका छ। यसमा करिब १८ हजार दक्षिण कोरियाली सैनिक सहभागी हुँदैछन्। उत्तर कोरियाको बढ्दो सैन्य क्षमताको सामना गर्न ड्रोन नियन्त्रण, जीपीएस सिग्नल अवरोध तथा साइबर आक्रमणविरुद्धका अभ्यास समावेश छन्।
दक्षिण कोरियाको संयुक्त सैन्य प्रमुखले अभ्यास सोमबार पूर्वनिर्धारित तालिकाअनुसार सुरु भएको बताए पनि ट्रम्पको टिप्पणीबारे प्रतिक्रिया दिएका छैनन्। पेन्टागनले थप जानकारीका लागि ह्वाइट हाउसतर्फ संकेत गरेको छ।
ट्रम्पले आफ्नो पहिलो कार्यकालदेखि नै दक्षिण कोरियासँगका सैन्य अभ्यासलाई खर्चिलो र उत्तेजक भन्दै घटाउने प्रयास गर्दै आएका छन्। दक्षिण कोरियामा करिब २८ हजार ५०० अमेरिकी सैनिक तैनाथ छन्।
उत्तर कोरियाले यस्ता संयुक्त अभ्यासलाई आफूविरुद्धको आक्रमणको तयारी भन्दै विरोध गर्दै आएको छ। विश्लेषकहरूका अनुसार ट्रम्पको पछिल्लो कदम उत्तर कोरियासँग पुनः कूटनीतिक संवाद अघि बढाउने प्रयास पनि हुन सक्छ। पछिल्लो समय उत्तर कोरियाले क्षेप्यास्त्र परीक्षण र आणविक क्षमतामा निरन्तर प्रगति गरिरहेको भन्दै अमेरिकी अधिकारीहरूले सुरक्षा चिन्ता व्यक्त गर्दै आएका छन्।
