सुदूरपश्चिम प्रदेशका मुख्यमन्त्री कमल बहादुर शाहले आज लम्कीचुहा नगरपालिका-३ स्थित व्यवस्थितनगर खेलमैदानमा एक करोड रुपैयाँ लागतको प्याराफिट (दर्शक ग्यालरी) निर्माणको शिलान्यास गरे। यसले गर्दा २ हजारभन्दा बढी दर्शकहरूले खेलकुद प्रतियोगिता हेर्न सक्नेछन्।
शिलान्यास अवसरमा मुख्यमन्त्री शाहले “प्रदेश सरकार खेलकुद क्षेत्रको विकासलाई प्राथमिकता दिँदै आएको छ। यसै अन्तर्गत यो प्याराफिट निर्माण गरिँदैछ” भन्दै प्रदेशका खेलाडीहरूले राष्ट्रिय तथा अन्तर्राष्ट्रिय स्तरमा गरेको उत्कृष्ट प्रदर्शनको प्रशंसा गरे। उनले टीकापुरमा स्पोर्ट्स एकेडेमी निर्माण र धनगढीका खेल संरचनाहरूको स्तरोन्नति गर्ने योजनाको पनि जानकारी दिए।
स्थानीय वडा अध्यक्ष लभ बहादुर शाहीले “यो परियोजनाले नगरको खेलकुद विकासमा महत्त्वपूर्ण योगदान पुग्नेछ” भन्ने बताए। उनले मुख्यमन्त्री शाहको यस प्रकारको पहललाई सराहना गर्दै यस्ता विकास कार्यहरू अझ बढी हुने आशा व्यक्त गरे।
यसअघि पनि प्रदेश सरकारले यसै खेलमैदानको पूर्वाधार विकासका लागि बजेट विनियोजन गरेको थियो। नयाँ प्याराफिट निर्माण पूरा भएपछि यो मैदान क्षेत्रीय तथा राष्ट्रिय स्तरका खेलकुद आयोजनका लागि पनि उपयुक्त हुने अपेक्षा स्थानीय खेलप्रेमीहरूले गरेका छन्।
