३ अर्बभन्दा बढी रकमको भ्रष्टाचार अभियोगमा विशेष अदालतमा मुद्दा दर्ता भएलगत्तै नेपाली कांग्रेसका नेता तथा सिन्धुपाल्चोक–२ बाट निर्वाचित प्रतिनिधिसभा सदस्य मोहनबहादुर बस्नेत सांसद पदबाट स्वतः निलम्बित भएका छन्।
अख्तियार दुरुपयोग अनुसन्धान आयोगले बिहीबार बस्नेतसहित १६ जना व्यक्ति र दुई कम्पनीविरुद्ध भ्रष्टाचार निवारण ऐन, २०५९ अन्तर्गत विशेष अदालतमा मुद्दा दायर गरेपछि उनी निलम्बनमा परेका हुन्।
प्रचलित ऐनको दफा ३३ अनुसार भ्रष्टाचार मुद्दा दर्ता भएको अवस्थामा सम्बन्धित सार्वजनिक पदधारीको पद स्वतः निलम्बनमा जाने व्यवस्था छ।
२०७९ सालको निर्वाचनमा बस्नेत सिन्धुपाल्चोक–२ बाट प्रत्यक्ष निर्वाचित सांसद बनेका थिए। अब उनीमाथि अदालतको अन्तिम फैसला नआएसम्म संसद्को कुनै अधिकार प्रयोग गर्न पाउने छैनन्।
