मनसुनको न्यूनचापीय रेखा सरदर स्थानको आसपास रहेकाले सोमबार बिहान सातै प्रदेशका विभिन्न भागमा हल्कादेखि मध्यम वर्षा भइरहेको छ। पछिल्लो एक घण्टामा सर्लाहीको मलंगवामा २५ मिलिमिटर र बर्दियाको मानपुरमा २५.८ मिलिमिटर वर्षा मापन भएको छ।
पछिल्लो तीन घण्टामा बाराको निजगढमा ७० मिलिमिटर, सर्लाहीको मानुसमरामा ५२.६ मिलिमिटर, बर्दियाको मानपुरमा ६८.८ मिलिमिटर, सर्लाहीको मलंगवामा ३४.२ मिलिमिटर र रौतहटको रामोली बैरियामा २९.६ मिलिमिटर वर्षा भएको मौसम महाशाखाले जनाएको छ।
दिउँसो देशभर सामान्य बदली रहनेछ। पहाडी भू-भागका धेरै स्थानमा र मधेश प्रदेशसहित तराईका केही भागमा मध्यम वर्षा हुने सम्भावना छ। साथै, कोशी प्रदेश, बागमती प्रदेश, गण्डकीको पहाडी क्षेत्र, लुम्बिनी र सुदूरपश्चिम प्रदेशको तराईमा एक–दुई स्थानमा भारी वर्षा हुने पूर्वानुमान गरिएको छ।
राति पनि देशभर सामान्य बदली रहनेछ। मधेश प्रदेश, कोशी, बागमती, गण्डकी र लुम्बिनी प्रदेशको पहाडी तथा तराई भू-भागका धेरै स्थानमा र बाँकी प्रदेशका केही स्थानमा मध्यम वर्षाको सम्भावना छ। त्यस्तै, कोशीको पहाडी भू-भाग तथा मधेश, लुम्बिनी र सुदूरपश्चिमको तराई क्षेत्रमा एक–दुई स्थानमा भारी वर्षा हुनसक्ने महाशाखाले चेतावनी दिएको छ।
