नेपाल सम्वत् ११४६ आज देशभर विविध कार्यक्रमका बीच मनाइँदैछ। नेवार समुदायले यसलाई नयाँ वर्षका रूपमा विशेष रूपमा मनाउने गरेका छन्। राष्ट्रिय विभूति शंखधर साःख्वाले विसं ९३७ (इ. सं. ८८०) मा गरिब जनताको ऋणमोचन गरी नेपाल सम्वत्को सुरुवात गरेका थिए।
लुम्बिनी बौद्ध विश्वविद्यालयका पूर्वउपकुलपति डा. त्रिरत्न मानन्धरका अनुसार, लिच्छविकालका राजा राघवदेवको शासनकालदेखि सुरु भएको नेपाल सम्वत् पृथ्वीनारायण शाहको शासनकालसम्म मौलिक सम्वत्का रूपमा चलेको थियो। विसं २००७ मा प्रजातन्त्र स्थापना भएपछि राष्ट्रिय मान्यता पाउने अभियान अघि बढाइएको हो।
नेवार समुदाय काठमाडौँ, ललितपुर, भक्तपुर, बनेपा, धुलिखेल, बाह्रबिसे र दोलखामा विशेषरूपमा नेपाल सम्वत् मनाउने गर्दछ। शंखधर साःख्वाले गरिब जनताको ऋणमुक्ति गराएको कार्य सामाजिक सेवाको उत्कृष्ट उदाहरण मानिएको छ र उनलाई २०५६ सालमा तत्कालीन प्रधानमन्त्री कृष्णप्रसाद भट्टराईले राष्ट्रिय विभूति घोषणा गरेका थिए।
विसं २०६५ मा प्रधानमन्त्री पुष्पकमल दाहालले पनि नेपाल सम्वत् राष्ट्रिय मान्यता पाउने घोषणा गरेका थिए। कात्तिक कृष्ण औँसीमा नयाँ बही खाता सुरु गर्ने परम्परा अझै काठमाडौँमा प्रचलित छ। नेपाल सम्वत् हाम्रो मौलिक संस्कृति र राष्ट्रिय पहिचानको प्रतीक बनेको छ।
