गिर्दै गिर्दै तरल मतिले काम गर्छौ तमाम
च्यात्छौ आफ्ना परिचय सबै नाम पार्टी गुलाम
खोस्छौ हाँस्दै प्रमुख पद ती भागबण्डा गरेर
रोप्छौ निक्कै बिउ कलहको स्वार्थनामी बनेर ।
आसेपासे कमसल सबै विघ्नकारी मिलेर
निल्छौ ठेक्का कमिशन कठै बन्धकी भो विवेक
पोष्दै पार्टी क्षय मुलुकको गर्न साक्षी बसेर
गाल्छौ आत्मा पतित जड भै मातृभू यो डसेर ।
पिट्दै डंका भ्रम लहरको लास मात्रै बनेर
बोक्छौ झण्डा अमुक दलको दास मात्रै बनेर
पार्टी नेता वरपर बसी भाष्य चर्को बनाई
स्वार्थी बन्छौ दिलखुस गरी देश खाल्डो गराई ।
होलान् गाडी महल गतिलो बैंक खाता दरिलो
आम्दानीका सयतिर खुला स्रोत होलान् भरिलो
भोग्नेछौ के अपच धन यी मेख मार्दै समाज?
भ्रष्टाचारी घर घर चुनी थुत्नु पर्ने छ आज ।
✍️ प्रा. डा. मन प्रसाद वाग्ले
