हाल नेपालमा पश्चिमी न्यून चापीय प्रणाली र स्थानीय वायुको प्रभावका कारण मौसम बदली भएको छ। मौसम पूर्वानुमान महाशाखाका अनुसार सुदूरपश्चिमसहित देशका पहाडी र हिमाली क्षेत्रमा साधारणदेखि घना बादल लागेको छ भने तराईमा आंशिक बदली रहनेछ।
आज दिउँसो हिमाली क्षेत्रमा अधिकांश बादल रहनेछ भने पहाडी क्षेत्रमा पनि सामान्य बदली रहनेछ। कोशी, बागमती र गण्डकी प्रदेशका पहाडी तथा हिमाली भूभागमा धेरै स्थानमा चट्याङ्ग, हावाहुरी र असिनासहित मध्यम वर्षा तथा हिमपातको सम्भावना रहेको छ। अन्य प्रदेशका केही स्थानमा पनि यस्तै प्रभाव देखिन सक्ने अनुमान गरिएको छ।
रातिको समयमा पनि मौसम बदली रहनेछ। कोशी, मधेस, बागमती, गण्डकी र लुम्बिनी प्रदेशका केही स्थानमा तथा कर्णाली र सुदूरपश्चिमका पहाडी क्षेत्रमा वर्षा र हिमपातको सम्भावना रहेको छ। तराईका एक–दुई स्थानमा पनि चट्याङ्ग र हावाहुरीसहित वर्षा हुन सक्ने जनाइएको छ।
मौसमको यस अवस्थाले दैनिक जनजीवन, यातायात तथा कृषिमा प्रभाव पार्न सक्ने भएकाले सतर्कता अपनाउन महाशाखाले आग्रह गरेको छ।
