काठमाडौँको त्रिवि क्रिकेट मैदानमा नेपालले स्कटल्याण्डलाई ६ विकेटले पराजित गर्दै आईसीसी क्रिकेट विश्वकप लिग–२ को पाँचौँ स्थानमा उक्लिएको छ। स्कटल्याण्डले दिएको १९५ रनको लक्ष्य नेपालले ३८ ओभर १ बलमा ४ विकेट गुमाउँदै १९९ रन बनाएर पूरा गर्यो।
नेपालको जितमा कप्तान रोहितकुमार पौडेल नायक बने। उनले अविजित ७४ रनको उत्कृष्ट पारी खेले, जसमा ९८ बलमा ५ चौका र २ छक्का प्रहार गरे। रोहितले इशान पाण्डेसँग तेस्रो विकेटका लागि शतकीय साझेदारी गरे। इशानले ५५ रन जोड्दै ५ चौका र २ छक्का प्रहार गरे। ओपनिङमा कुशल भुर्तेलले २८ र आसिफ शेखले २९ रनको योगदान दिए। उपकप्तान दीपेन्द्रसिंह ऐरी २ रनमा आउट हुँदा आरिफ शेख ८ रनमा अविजित रहे। स्कटल्याण्डका मार्क वाटले २ विकेट लिए।
त्यसअघि स्कटल्याण्ड ३९ ओभर १ बलमा १९४ रनमै सीमित भयो। ब्रेन्डन म्याकमुलेनले ७३ र माइकल इंग्लिसले ५१ रन बनाए। नेपालका ललित राजवंशीले ४ विकेट लिए भने सन्दीप लामिछानेले ३ विकेट झारे। यो जितसँगै नेपाल २७ खेलमा २२ अंक जोड्दै पाँचौँ स्थानमा पुगेको छ। अब नेपालले अन्तिम खेल अमेरिकासँग खेल्नेछ।
