सहआयोजक क्यानडाले फिफा विश्वकप २०२६ को आफ्नो पहिलो खेलमा बोस्निया एन्ड हर्जगोभिनासँग १–१ गोलको बराबरी खेलेको छ। टोरन्टो स्टेडियममा गएराति भएको प्रतिस्पर्धात्मक खेलमा दुवै टोलीले एक–एक गोल गर्दै अंक बाँडेका हुन्।
बोस्नियाले खेलको २१औँ मिनेटमा जोभो लुकिचको गोलमार्फत अग्रता लिएको थियो। सियाड कोलासिनाचले कर्नरबाट दिएको उत्कृष्ट हेडर फ्लिकलाई लुकिचले हेडमार्फत गोलमा परिणत गर्दै टोलीलाई सुरुआती बढत दिलाएका थिए।
घरेलु समर्थकमाझ दबाबमा रहेको क्यानडाले खेलको ७८औँ मिनेटमा बराबरी गोल फर्कायो। साइल लारिनले उत्कृष्ट फिनिसिङ गर्दै टोलीलाई खेलमा फर्काएका थिए। त्यसपछि दुवै टोलीले केही अवसर सिर्जना गरे पनि थप गोल हुन नसक्दा खेल १–१ को बराबरीमा सकियो।
यस नतिजासँगै समूह ‘बी’ मा रहेका क्यानडा र बोस्निया एन्ड हर्जगोभिनाले पहिलो खेलबाट समान एक–एक अंक जोडेका छन्। यही समूहमा स्विट्जरल्यान्ड र कतार पनि रहेका छन्।
