परराष्ट्रमन्त्री शिशिर खनाल आज चारदिने औपचारिक भ्रमणका लागि चीन प्रस्थान गर्दैछन् । चीनको कम्युनिष्ट पार्टी केन्द्रीय समितिको राजनीतिक ब्युरोका सदस्य तथा चिनियाँ विदेशमन्त्री वाङ यीको निमन्त्रणामा उनी भ्रमणमा जान लागेका हुन् ।
भ्रमणका क्रममा मन्त्री खनालले बेइजिङमा चिनियाँ समकक्षी वाङ यीसँग द्विपक्षीय वार्ता गर्नेछन् । साथै, उनले चीन सरकारका उच्चस्तरीय पदाधिकारीहरूसँग शिष्टाचार भेटवार्ता गर्ने कार्यक्रम पनि रहेको परराष्ट्र मन्त्रालयले जनाएको छ । भेटमा नेपाल–चीन सम्बन्धलाई थप सुदृढ बनाउने र विभिन्न क्षेत्रमा सहकार्य विस्तार गर्ने विषयमा छलफल हुनेछ ।
मन्त्री खनालले बेइजिङस्थित नेपाली राजदूतावासद्वारा आयोजित लगानी सम्मेलनमा समेत सहभागिता जनाउनेछन् । उक्त सम्मेलनमार्फत नेपालमा वैदेशिक लगानी प्रवर्द्धन गर्ने लक्ष्य राखिएको छ । उनले चिनियाँ व्यवसायीहरूसँग अन्तरक्रिया गर्दै नेपालका लगानी अवसरबारे जानकारी गराउने कार्यक्रम छ ।
त्यसैगरी, मन्त्री खनालको सम्मानमा आयोजित स्वागत समारोहमा सहभागी हुँदै उनले चीनमा रहेका नेपाली समुदायसँग पनि भेटघाट गर्नेछन् । मन्त्रीको प्रतिनिधि मण्डलमा परराष्ट्र मन्त्रालयका उच्च अधिकारीहरू समेत रहेका छन् ।
