फिफा विश्वकपको राउन्ड अफ ३२ अन्तर्गत सोमबार राति भएको रोमाञ्चक प्रतिस्पर्धामा पाँच पटकको विश्व विजेता ब्राजिलले जापानलाई २–१ गोलले पराजित गर्दै अन्तिम १६ मा स्थान सुरक्षित गरेको छ। खेलको २९औँ मिनेटमा काइसु सानोले गोल गर्दै जापानलाई अग्रता दिलाएका थिए। दोस्रो हाफमा ब्राजिलले लगातार दबाब सिर्जना गर्दै ५६औँ मिनेटमा क्यासेमिरोको हेडरमार्फत बराबरी गोल फर्कायो।
खेल अतिरिक्त समयमा धकेलिएको अवस्थामा इन्जुरी समयको छैटौँ मिनेटमा सब्स्टिच्युट ग्याब्रिएल मार्टिनेलीले निर्णायक गोल गर्दै ब्राजिललाई रोमाञ्चक जित दिलाए। यससँगै ब्राजिलले आइतबार हुने अन्तिम १६ को खेलमा आइभोरी कोस्ट वा नर्वेमध्ये एकसँग प्रतिस्पर्धा गर्नेछ।
हारसँगै जापानको विश्वकप नकआउट चरणमा पहिलो जित निकाल्ने सपना फेरि अधुरै रह्यो भने पछिल्लो १० खेलदेखिको अपराजित यात्रा पनि समाप्त भयो। जापानविरुद्ध ब्राजिलको यो १५ भेटमध्ये १२औँ जित हो। सन् १९५८ मा पेलेले ब्राजिललाई पहिलो विश्वकप उपाधि दिलाएको ऐतिहासिक दिनकै वार्षिकोत्सवमा आएको यो जित ब्राजिलका लागि थप विशेष बनेको छ।
