स्टार फरवार्ड किलियन एम्बाप्पेको उत्कृष्ट प्रदर्शनमा फ्रान्स फिफा विश्वकप फुटबल प्रतियोगिताको अन्तिम १६ मा प्रवेश गरेको छ। अमेरिकाको न्युजर्सीस्थित रंगशालामा भएको खेलमा फ्रान्सले स्विडेनलाई ३–० गोलअन्तरले पराजित गर्दै सहज रूपमा नकआउट चरणमा स्थान सुरक्षित गर्यो।
फ्रान्सको जितमा एम्बाप्पे नायक बने। उनले पहिलो हाफको ४५औँ मिनेटमा गोल गर्दै टोलीलाई अग्रता दिलाए। दोस्रो हाफको ५३औँ मिनेटमा ब्राडली बारकोलाले अर्को गोल थपेपछि फ्रान्स २–० ले अघि बढ्यो। त्यसपछि ७४औँ मिनेटमा एम्बाप्पेले व्यक्तिगत दोस्रो गोल गर्दै टोलीको शानदार जित पक्का गरे।
खेलभर स्विडेनले फ्रान्सको बलियो रक्षापङ्क्ति र आक्रामक खेललाई चुनौती दिन सकेन। फ्रान्सले अधिकांश समय खेलमा नियन्त्रण कायम राख्दै प्रभावशाली प्रदर्शन गरेको थियो।
यस जितसँगै फ्रान्सले क्वार्टरफाइनल प्रवेशका लागि अन्तिम १६ मा पाराग्वेसँग प्रतिस्पर्धा गर्नेछ।
यता, अन्तिम ३२ अन्तर्गत अर्को खेलमा नर्वेले आइभरी कोस्टलाई २–१ ले हराउँदै अन्तिम १६ मा स्थान बनाएको छ। साथै, प्रतियोगिताको अर्को महत्वपूर्ण खेलमा आज बिहान मेक्सिको र इक्वेडोर आमनेसामने हुनेछन्। विश्वकपको नकआउट चरण रोचक बन्दै जाँदा उपाधि दाबेदार टोलीहरूबीचको प्रतिस्पर्धा झन् रोमाञ्चक हुने अपेक्षा गरिएको छ।
