साविक विजेता अर्जेन्टिना फिफा विश्वकप २०२६ को अन्तिम–१६ मा अफ्रिकी शक्ति इजिप्टसँग भिड्दैछ। अमेरिकाको एटलान्टामा हुने यो बहुप्रतीक्षित खेल नेपाली समयअनुसार मंगलबार राति ९:४५ बजे सुरु हुनेछ। विश्वकप इतिहासमा यी दुई टोली पहिलो पटक आमनेसामने हुन लागेका हुन्।
लियोनल मेसीको कप्तानीमा रहेको विश्व नम्बर–१ अर्जेन्टिना अपराजित रहँदै नकआउट चरणमा पुगेको हो। समूह चरणका तीनै खेल जितेको अर्जेन्टिनाले अन्तिम–३२ मा केप भर्डेलाई अतिरिक्त समयमा ३–२ ले हराउँदै अन्तिम–१६ मा स्थान बनाएको थियो। मेसीले चारै खेलमा गोल गर्दै प्रतियोगितामा संयुक्त रूपमा सर्वाधिक ७ गोल गरेका छन् र लगातार नयाँ कीर्तिमान बनाइरहेका छन्।
यता, सात पटकको अफ्रिकी च्याम्पियन इजिप्टले पनि अपराजित यात्रा कायम राखेको छ। समूह चरण पार गर्दै पहिलो पटक विश्वकपको नकआउट खेल जितेको इजिप्टले अस्ट्रेलियालाई पेनाल्टी सुटआउटमा ४–२ ले पराजित गर्दै इतिहास रचेको थियो। कप्तान मोहम्मद सलाह र मिडफिल्डर इमाम असौर इजिप्टका प्रमुख आशा हुन्।
समग्र भेटमा भने अर्जेन्टिनाको स्पष्ट पकड छ। यसअघि भएका दुवै खेल अर्जेन्टिनाले जितेको थियो। यद्यपि विश्वकपमा पहिलो भेट भएकाले खेल निकै प्रतिस्पर्धात्मक हुने अपेक्षा गरिएको छ। अर्जेन्टिनाले उपाधि रक्षा अभियानलाई निरन्तरता दिने लक्ष्य राख्दा इजिप्ट विश्व फुटबलमा अर्को ऐतिहासिक सफलता हासिल गर्ने योजनामा मैदान उत्रिनेछ।
