गुलरीया: कृष्णपुर नगरस्तरीय १४ औं राष्ट्रपति रनिङ्ग शिल्ड छनोटको उपाधि समैजी माविले जितेको छ । शुक्रबार कृष्ण मावि गुलरीयाको प्राङंगणमा सम्पन्न छनोट प्रतियोगीताको उपाधि दोश्रो पटक समैजी माविले जितेको हो । कृष्ण मावि गुलरीयाकै प्राङंगणमा अघिल्लो वर्ष सम्पन्न १३ औं राष्ट्रपति रनिङ्ग शिल्ड छनोटको उपाधि पनि समैजी माविले नै जितेको थियो । कृष्णपुर नगरपालिकाको आयोजनामा पौष २४ गतेदेखि शुरु भएको १४ औं राष्ट्रपति रनिङ्ग शिल्ड छनोट प्रतियोगीतामा सहभागी २५ विद्यालयलाई पछि पार्दै समैजीले यसपटक पनि उपाधि हात पारेको हो ।
समैजी ६ स्वर्ण,४ रजत र ७ कास्य गरी जम्मा १७ पदकका साथ प्रथम भएको हो । त्यस्तै सनलाइट बो.स्कुलले ५ स्वर्ण,६ रजत र ५ कास्य गरी जम्मा १६ पदकका साथ दोश्रो भएको छ भने ५ स्वर्ण पदक सहित डाइमण्ड ई.बो.स्कुल तृतिय भएको छ । छनोट प्रतियोगीतामा प्रथम,दृतिय र तृतिय स्थान हाँसिल गर्ने विद्यालयलाई प्रतियोगीता मुल आयोजक समितिका संयोजक एंव कृष्णपुर नगरपालिकाका नगरप्रमुख हेमराज ओझाले एक औपचारिक कार्यक्रमका बीच पुरस्कार तथा शिल्ड प्रदान गरे । नगरस्तरीय छनोट प्रतियोगीतामा नगरभरीका १३ सामुदायिक र १२ संस्थागत गरी २५ विद्यालयको सहभागिता रहेको थियो ।
समापन समारोहमा बोल्दै १४ औं राष्ट्रपति रनिङ्ग शिल्ड छनोट प्रतियोगीतामा मुल आयोजक समितिका संयोजक एंव कृष्णपुर नगरपालिकाका नगरप्रमुख हेमराज ओझाले कृष्णपुर नगरपालिकाले खेलकुदलाई उच्च प्राथमिकतामा राखेर काम गरिरहेको बताए । उनले राष्ट्रपति रनिङ्ग शिल्डमा सहभागी नभएका खेलहरु क्रिकेट र फुटबललाई मेयर कपको रुपमा छिट्टै सञ्चालन गरिने समेत बताए । खेलकुदको प्रारम्भ बिन्दु नै विद्यालय भएको भन्दै नगरप्रमुख ओझाले आगामी राष्ट्रपति रनिङ्ग शिल्डलाई थप व्यवस्थित तथा गुणस्तरीय तरीकाले सञ्चानल गर्ने गरी काम गर्ने प्रतिबद्धता व्यक्त गरे । यसैवर्ष १४ औं राष्ट्रपति रनिङ्ग शिल्ड जिल्ला स्तरीय छनोट प्रतियोगीता पनि कृष्णपुर नगरपालिकामै आयोजना हुनेछ त्यसका लागि पनि भोलिदेखि नै नगरपालिकाको टिमले तयारी थाल्ने नगरप्रमुख ओझाले बताए ।
नगरप्रमुख हेमराज ओझाको अध्यक्षतामा सम्पन्न १४ औं राष्ट्रपति रनिङ्ग शिल्ड छनोट प्रतियोगीताको प्रमुख अतिथि राष्ट्रिय भूमि आयोग कञ्चनपुरका जिल्ला सदस्य दिल बहादुर देउवा रहेका थिए भने वडा न ३ का अध्यक्ष खेम चौधरी,वडा न.४ का अध्यक्ष धर्म बहादुर सिंह,विभिन्न विद्यालयका प्रअहरु र उल्लेख्य मात्रामा खेलप्रेमीहरुको उपस्थिति रहेको थियो ।
