नेपालमा मनसुन सक्रिय रहँदा आज सोमबार पनि मौसम बदली हुने अनुमान गरिएको छ। मौसम पूर्वानुमान महाशाखाका अनुसार मनसुनको न्यून चापीय रेखा सरदर स्थानको आसपासमा अवस्थित छ भने बङ्गालको खाडीबाट आएको जलवाष्पयुक्त हावाले मौसमलाई थप प्रभावित पारेको छ।
हाल कोशी प्रदेश र सुदूरपश्चिम प्रदेशसहितका पहाडी भू-भागमा सामान्यतया बदली छ भने अन्य क्षेत्रमा आंशिक बदली रहेको छ। गण्डकी र लुम्बिनी प्रदेशका केही स्थान, कोशी, बागमती र सुदूरपश्चिमका थोरै स्थान तथा कर्णालीका एक–दुई स्थानमा हल्कादेखि मध्यम वर्षा भइरहेको छ।
आज दिनभर देशभर सामान्य बदली रहने पूर्वानुमान छ। विशेषगरी कर्णाली र सुदूरपश्चिम प्रदेशका पहाडी तथा तराई भू-भागका धेरै स्थान, लुम्बिनी प्रदेशका केही स्थान तथा बाँकी प्रदेशका पहाडी भू-भागका थोरै स्थानमा मध्यम वर्षाको सम्भावना छ।
त्यस्तै, कर्णाली र सुदूरपश्चिम प्रदेशका केही स्थानमा भारी वर्षा हुन सक्ने चेतावनी महाशाखाले जारी गरेको छ। साथै, लुम्बिनी र सुदूरपश्चिम प्रदेशका तराई भू-भागमा हावाहुरीको समेत सम्भावना भएकाले सतर्क रहन आग्रह गरिएको छ।
