रोल्पाको थवाङ गाउँपालिका–१ जलजला क्षेत्रमा भएको जिप दुर्घटनामा २० जनाको ज्यान गएको छ, जसमा एउटै परिवारका ७ जना सदस्य रहेका पुष्टि भएको छ। रुकुमपूर्व सिस्ने गाउँपालिका–५ टाकुराका दुई दाजुभाइका परिवारका सदस्यहरू घटनास्थलमै मृत फेला परेका हुन्।
वडाध्यक्ष बीरेन्द्र बस्नेतका अनुसार दाजुको परिवारका छोरा, बुहारी, श्रीमती र नाति गरी ४ जना तथा भाइको परिवारका श्रीमती, छोरी र छोरा गरी ३ जनाको मृत्यु भएको हो। अन्य मृतकमध्ये ९ जना दाङका, ९ जना सिस्ने–५ टाकुराका र १ जना भूमे गाउँपालिका–५ का रहेका छन्।
लु १ ज ४१६७ नम्बरको बोलेरो जिप रुकुमपूर्वबाट जलजलातर्फ जाँदै गर्दा करिब ८ सय मिटर तल खसेको थियो। वर्षा र अँध्यारोका कारण बिहीबार राति उद्धार रोकिए पनि शुक्रबार बिहानदेखि सुरक्षाकर्मीको सहयोगमा शव संकलन गरी थवाङतर्फ ल्याइँदैछ।
दुर्घटनामा १२ महिला, ४ पुरुष र ४ बालकको मृत्यु भएको छ भने ३२ वर्षीय समिर कामी घाइते भई उपचारमा छन्।
