खाद्य प्रविधि तथा गुण नियन्त्रण विभागले डाबर नेपाल प्रालिद्वारा उत्पादन गरिएको डाबर हनी नमुना परीक्षणका क्रममा न्यून गुणस्तरको भेटिएको जनाएको छ। विभागका अनुसार परीक्षणबाट मापदण्डअनुसार गुणस्तर नपुगेपछि सम्बन्धित ब्याचका उत्पादन तत्काल बजारबाट फिर्ता गर्न तथा बिक्री–वितरण रोक्न उत्पादक कम्पनीलाई निर्देशन दिइएको हो।
विभागले खाद्य स्वच्छता तथा गुणस्तर ऐन, २०८१ को दफा ३८(२) अनुसार उक्त ब्याच नम्बरका सबै उत्पादन बजारबाट हटाउन आदेश जारी गरेको जनाएको छ। उपभोक्ताको स्वास्थ्य सुरक्षालाई प्राथमिकता दिँदै निगरानी र अनुगमनलाई थप कडाइ गरिने पनि उल्लेख गरिएको छ।
यससँगै विभागले म्याग्नेसियम ग्लाइसिनेट समावेश भएका कुनै पनि खाद्य पदार्थ उत्पादन, बिक्री वा वितरण नगर्न सम्बन्धित पक्षलाई आग्रह गरेको छ। निर्देशन विपरीत त्यस्ता खाद्य पदार्थ बिक्री–वितरण गरिएको पाइए कानुनअनुसार कारबाही गरिने चेतावनी समेत विभागले दिएको छ।
