इतिहासकै ठूलो विश्वकप : फिफा विश्वकप २०२६ खेल तालिका (नेपाली समय अनुसार)

फिफा विश्वकप–२०२६ आगामी जुन ११ देखि जुलाई १९ (जेठ २८ देखि साउन ३ गते) सम्म आयोजना हुँदैछ। यो संस्करण विश्वकप फुटबलको इतिहासकै सबैभन्दा ठूलो प्रतियोगिताका रूपमा रहनेछ।

पहिलो पटक विश्वकप तीन देश—संयुक्त राज्य अमेरिका, क्यानाडा र मेक्सिकोले संयुक्त रूपमा आयोजना गर्न लागेका हुन्। यस संस्करणमा पहिलो पटक ४८ राष्ट्रको सहभागिता रहनेछ, जसले प्रतियोगितालाई थप व्यापक, रोमाञ्चक र प्रतिस्पर्धात्मक बनाउने अपेक्षा गरिएको छ।

विश्वकपका खेलहरू उत्तर अमेरिकाका १६ विभिन्न सहरमा सञ्चालन हुनेछन्। करिब एक महिनाभन्दा बढी समय चल्ने प्रतियोगितामा कुल १०४ खेल खेलाइनेछन्। विस्तारित टोली संख्या र संयुक्त आयोजनाका कारण २०२६ को विश्वकप विश्व फुटबल इतिहासकै सबैभन्दा भव्य र विशेष संस्करणका रूपमा रहने विश्वास गरिएको छ।