चिनियाँ राष्ट्रपति सी जिनपिङ राजकीय भ्रमणका क्रममा उत्तर कोरिया पुगेका छन्। उनलाई उत्तर कोरियाली सर्वोच्च नेता किम जोङ उन र उनकी पत्नी री सोल जूले विमानस्थलमा भव्य स्वागत गरेका छन्। विमानस्थलमा रातो कार्पेट ओछ्याइएको थियो भने उत्तर कोरियाली सैनिकहरू लाइनबद्ध भएर सम्मान प्रकट गरेका थिए।
चीनको सरकारी सञ्चारमाध्यम सीसीटीभीले सार्वजनिक गरेको भिडियोमा किम जोङ उन र उनकी पत्नी मुस्कुराउँदै र ताली बजाउँदै राष्ट्रपति सीलाई स्वागत गरेको देखिन्छ। यद्यपि, सी र उनको टोलीलाई सो भिडियोमा स्पष्ट रूपमा देखाइएको छैन।
अर्को चिनियाँ समाचार एजेन्सी सिन्ह्वाका अनुसार, किम जोङ उन र राष्ट्रपति सीबीच हात मिलाएर भेटघाट भएको छ। साथै, उत्तर कोरियाली बालबालिकाले राष्ट्रपति सी र उनकी पत्नी पेङ लियुआनलाई पुष्पगुच्छा अर्पण गरेका छन्।
दुई देशका शीर्ष नेताबीच कुन विषयमा छलफल भइरहेको छ भन्नेबारे आधिकारिक विवरण सार्वजनिक गरिएको छैन। भ्रमणसँग सम्बन्धित थप जानकारी आउने क्रम जारी रहेको जनाइएको छ।
