नेपाल पत्रकार महासंघ कैलाली शाखाले कैलालीका स्थानीय तहहरूलाई मिडियामैत्री कानुन, नीति तथा बजेट व्यवस्था गर्न आग्रह गर्दै ज्ञापनपत्र बुझाउने अभियानलाई तीव्रता दिएको छ।
आगामी आर्थिक वर्ष २०८३/८४ को नीति, कार्यक्रम तथा बजेट तर्जुमाको क्रममा सञ्चार क्षेत्रलाई प्राथमिकतामा राख्न दबाबस्वरूप महासंघले जिल्लाभरका स्थानीय सरकारसमक्ष ज्ञापनपत्र बुझाउन थालेको हो। महासंघले संविधान तथा प्रचलित कानुनअनुसार सञ्चारमैत्री नीति, कानुन र कार्यविधि निर्माण गर्न तथा स्थानीय सञ्चारमाध्यमको संरक्षण र प्रवर्द्धनका लागि आवश्यक बजेट विनियोजन गर्न माग गरेको छ।
महासंघले सरकारी सूचना तथा विज्ञापन सरकारी सञ्चारमाध्यममा मात्र प्रकाशन तथा प्रसारण गर्ने नीतिले निजी सञ्चारमाध्यम आर्थिक संकटमा परेको उल्लेख गर्दै उक्त निर्णय पुनरावलोकन गर्नुपर्ने आवश्यकता औँल्याएको छ। साथै पत्रकारिता विकास, पत्रकारहरूको क्षमता अभिवृद्धि र मिडिया सुदृढीकरणका कार्यक्रम सञ्चालनका लागि नेपाल पत्रकार महासंघ कैलाली शाखामार्फत बजेट व्यवस्थापन गर्न स्थानीय तहहरूलाई आग्रह गरिएको छ।
ज्ञापनपत्रमा स्थानीय पत्रपत्रिका, एफएम रेडियो, अनलाइन तथा अन्य सञ्चारमाध्यमहरूको संस्थागत विकास र प्रवर्द्धनका लागि विशेष कार्यक्रम सञ्चालन गर्नुपर्ने तथा स्थानीय तहका सूचना, योजना, बजेट, सार्वजनिक सेवा र विकास गतिविधिको प्रचारप्रसारमा स्थानीय सञ्चारमाध्यमलाई प्राथमिकता दिनुपर्ने सुझावसमेत समेटिएको छ।
नेपाल पत्रकार महासंघ कैलाली शाखाका अध्यक्ष श्रवण देउवाका अनुसार कैलालीका १३ स्थानीय तहमध्ये हालसम्म ९ वटामा ज्ञापनपत्र बुझाइसकिएको छ भने बाँकी ४ स्थानीय तहमा पनि चाँडै ज्ञापनपत्र बुझाइने तयारी भइरहेको छ।
अध्यक्ष देउवाले स्थानीय सञ्चारमाध्यमको सुदृढीकरण, पत्रकारिताको विकास तथा अभिव्यक्ति स्वतन्त्रताको संरक्षणका लागि अभियानलाई निरन्तरता दिइने बताए। महासंघले स्थानीय सरकारलाई सञ्चार क्षेत्रप्रति उत्तरदायी र मिडियामैत्री बन्न आग्रह गर्दै जिल्लाभर अभियान सञ्चालन गरिरहेको जनाएको छ।
