इण्डियन प्रिमियर लिग (आइपीएल) अन्तर्गत आइतबार भएको दोस्रो खेलमा चेन्नई सुपर किंग्सले मुम्बई इण्डियन्सलाई चार विकेटले पराजित गर्दै जित हासिल गरेको छ। चेन्नईले मुम्बईले दिएको १५६ रनको लक्ष्य ५ बल बाँकी रहँदा ६ विकेट गुमाएर १५८ रन बनाउँदै पुरा गर्यो।
मुम्बईले टस हारेर पहिले ब्याटिङ गर्दै निर्धारित २० ओभरमा ९ विकेट गुमाएर १५५ रन बनाएको थियो। मुम्बईका तिलक वर्माले सर्वाधिक ३१ रन बनाए भने कप्तान सूर्यकुमार यादवले २९ रन जोडे। चेन्नईका बलर नुर अहमदले ४ विकेट लिई मुम्बईलाई सस्तोमा समेट्न महत्वपूर्ण भूमिका खेले। उनी खेलको ‘म्यान अफ द म्याच’ घोषित भए।
चेन्नईको जितमा ओपनर रचिन रविन्द्र र कप्तान ऋतुराज गायकवाडको प्रदर्शन उल्लेखनीय रह्यो। रविन्द्रले ४५ बलमा ६५ रन (४ छक्का, २ चौका) बनाए भने गायकवाडले २६ बलमा ५३ रन (६ चौका, ३ छक्का) जोडे। यसका साथै रविन्द्र जडेडाले १७ रन बनाए।
मुम्बईका बलर विघ्नेश पुथुरले ३ विकेट लिए भने दीपक चाहर र विल ज्याक्सले एकएक विकेट हात पारे। तथापि, चेन्नईले अन्तिम समयमा धैर्यता देखाउँदै जित हासिल गर्न सफल भयो।
यस जितसँगै चेन्नई सुपर किंग्सले आइपीएलको शुरुवाती चरणमै आफ्नो प्रभुत्व कायम राखेको छ।
