📢 कक्षा १२ को नतिजा आज साँझ सार्वजनिक हुने

कक्षा १२ को नतिजा आज (सोमबार) साँझ ५ बजे सार्वजनिक हुने तयारी गरिएको छ। राष्ट्रिय परीक्षा बोर्ड स्रोतका अनुसार आज साँझ बोर्डको बैठक बसेपछि नतिजा सार्वजनिक गरिनेछ।

बोर्डले हिजो (आइतबार) नतिजा प्रणालीको डेमो परीक्षण गरिसकेको छ। अब सबै तयारी पूरा भइसकेको र आज नै नतिजा प्रकाशित गर्ने योजना रहेको स्रोतले जनाएको छ।

क्यालेन्डर अनुसार साउन १५ भित्र नतिजा सार्वजनिक गरिनुपर्ने भए पनि गत चैत २० देखि सुरु भएको शिक्षक आन्दोलनका कारण ढिलाइ भएको हो। आन्दोलनका कारण ११ वैशाखमा तय गरिएको परीक्षा स्थगित भई २१ वैशाखदेखि सुरु भएको थियो।

यस वर्ष कक्षा १२ को परीक्षामा देशभरिबाट ५ लाख ११ हजार ५२५ विद्यार्थी सहभागी भएका थिए।